LAOAG CITY – Umaboten iti 4,636 a balud ti natay kadagiti pagbaludan iti napalabas a 5 a tawen segun iti Bureau of Corrections (BuCor).
Iti datos ti ahensia manipud Enero 1, 2020 agingga Hunio 30, 2024, agarup 1,182 a Person’s Deprived with Liberty ti natay idi 2020; 1,166 idi 2021; 925 idi 2022; 876 idi 2023; ken 487 ti natay manipud Enero 1 agingga Hunio 30 ti agdama a tawen.
Segun kenni Bureau of Corrections Director General Gregorio Pio P. Catapang Jr., kaaduan kadagiti natay ket saan pay a naikeddeng ti rason na.
Ngem naragsakan ti hepe ti Bureau of Corrections iti pannakapirma ti Declaration of Cooperation to Strengthen Procedures to Investigate Custodial Deaths of Persons Deprived of Liberty.
Agsipud ta iti sidong daytoy a deklarasion, masapul a maipasidong iti forensic autopsy ti bangkay ti pimmusay a balud sakbay a maipan iti funeral parlor.
Kinunana a makatulong daytoy nga addang tapno ma-assess ti kasasaad dagiti balud.
