LAOAG CITY – Nanayonan pay ti bilang dagiti natay idinto a sumurok 270 nga indibidual ti nagtalinaed a mapukpukaw kalpasan ti napasamak a dakkel nga uram iti maysa nga high-rise residential building idiay Hong Kong idi Mierkoles, Nobiembre 26.
Segun kadagiti lokal nga otoridad, 51 ti pimmusay iti nakapasamakan ti uram idinto nga uppat met ti natay iti ospital no sadinno nga adda ti maysa a bumbero ti pimmusay.
Basar iti imbestigasion, nauram ti pito manipud kadagiti walo a tower blocks iti Tai Po district.
Iti baet a naideklararen ti under control ti uppat a tower ket agtultuloy latta ti panangsebseb kadagiti dadduma pay a pasdek.
Immunan a naipangato iti level five ti uram, ti maibilang a “most serious level” idiay Hong Kong.
Naarestar metten dagiti tallo a construction company executives gapu iti “suspicion of manslaughter” ken gross negligence nga adda ti pakainaiganna iti nakita a flammable materials pakairamanan ti mesh ken plastic sheets kadagiti tawa dagiti pasdek a posible a nagbalin a rason tapno alisto a nagramram ti apoy.
Agtultuloy ti maiwaywayat nga imbestigasion iti namunganayan ti uram iti maysa nga housing complex a dumaldalan iti renovations.
Iti agdama, naibakwiten dagiti ginasgasut a residente iti temporary shelters idinto a nangilatang met ti emergency housing units para kadagiti dadduma a naapektaran ti uram.
