LAOAG CITY – Umaboten iti 188 a tattao ti natay idinto a nasurok a 1,500 a sabsabali dagiti nasugatan iti idadayyeg ti dua a napipigsa a gingined idiay Venezuela.
Segun ken ni Interim President Delcy Rodriguez, makitintinnulong ti gobierno kadagiti pribado a kompanya tapno makaala ti dadakkel a kagamitan ken mapaalisto ti panagbiruk ken panangisalakan kadagiti biktima.
Kakaroan a naapektaran ti La Guaira, maysa a probinsya nga asideg iti kabisera ti Caracas no sadinno a masarakan ti kangrunaan nga erupuerto ti ciudad.
Dakkel met ti perdisyon a napasaran ti Morón, Carabobo, nga asideg ti nagsentroan ti gingined.
Naruay a pagtaengan ti bimmagsak ken napukawan ti suplay ti kuryente ken danom dagiti residente.
Kinumpirmaran met ti lokal a gobierno a karaman kadagiti natay ket tallo nga ubbing.
Nagballaag ti U.S. Geological Survey a mabalin pay a ngumato ti bilang dagiti natay kabayatan ti agtultuloy a panagbirbiruk kadagiti mapukpukaw.
Mapatta-patta a rinibo pay ti mabalin a maapektaran ti dua a napipigsa a ginginged no sadinno a kinumpirmaran t nagduduma a lider ti oposisyon ti pagilian a saan a nalablabes ngem 10 ribo a tattao ti nagtalinaed a mapukpukaw.
Kabayatanna, nangipatulod metten ti Estados Unidos kadagiti search and rescue team, kabayatan nga agsagsagana met ti gobierno ti Amerika ti nayun a tulong para kadagiti lugar a nadadael iti Venezuela.
