LAOAG CITY – Dumanonen iti 19 nga indibidual ti natay kalpasan ti naiwayat a tignay protesta idiay Nepal.
Daytoy ket kalpasan a nakapungtot dagiti residente nangruna kadagiti agtutubo ti inaramid a panangpaserra ti gobierno iti social media pakairamanan ti kumarkaro a korapsion.
Nagusar ti tear gas ken rubber bullets dagiti otoridad gapu iti pananggandat a panangatake dagiti protesters iti parliament building.
Naammoan nga adda ti agarup 100 a tattao pakairamanan dagiti kapulisan ti nagsagaba ti sugat gapu iti insidente.
Maipalagip a nangitunda ti panagpungtot manipud kadagiti agtutubo ti panagdesision ti gobierno nga i-block ti access kadagiti social media platforms no sadinno a 90 a porsiento ti sumurok 30 a milyon a tattao idiay Nepal ti agus-usar ti internet ken social media.
Inlawlawag ti gobierno nga inpatungpalda ti pannakaipawil ti panagusar ti social media gapu ta napaay daytoy nga irehistro kadagiti otoridad gapu iti saan nga husto a panagusar pakairamanan ti panagraira kadagiti troll accounts nga agiwarwaras kadagiti fake news ken scams.
