LAOAG CITY – Saan nga apektado ti bilang dagiti pasahero kadagiti connecting flights ti Laoag International Airport iti mapaspasaran nga oil crisis.
Segun ken ni Mr. Rosito Tamayo, Acting Manager ti Civil Aviation Authority of the Philippines, sipud pay idi Nobiembre agingga ita ket adu dagiti pasahero kadagiti tallo a flights a Manila-Laoag nga aggapu kadagiti nagduduma a pagilian kangrunaanna iti Honolulu.
Gapu iti daytoy, kunana a maragsakan nga iti laksid ti mapaspasaran a krisis ket adu latta dagiti pasahero.
Kabayatanna, inpakaammona a dandanin a magun-od ti Laoag International Airport ken ti Provincial Government of Ilocos Norte ti kalikagumda nga adda ti direkta a flight manipud iti Honolulu.
Naammoan a maysa kadagiti addang ket ti kinaadda ti baro a firetruck a dakdakkel ti kapasidadna maidasig kadagiti dadduma a daytoy ket immun-unan nga inawat itay napalabas a lawas.
Innayonna a daytoy ket maysa kadagiti requirement tapno maipalubos nga agbiahe dagiti dakdakkel nga eroplano wenno dagiti maus-usar iti international flight.
