LAOAG CITY – Manamnama a dupudop dagiti agawid a pasahero ditoy probinsia manipud idiay Manila inton rabii wenno inton bigat para iti Undas 2024.
Daytoy ti inpakaammo ni Mr. Johnny Lipac, Dispatcher iti maysa a bus station ditoy siudad ti Laoag.
Segun kenkuana, iti dua nga aldaw sakbay ti Todos Los Santos ket posible ti panagadu ti bilang dagiti pasahero kadagiti sumaruno nga aldaw.
Inbatadna a mabalin a saan pay unay nga adu dagiti pasahero ita nga aldaw gapu iti pangta ti Bagyo Leon a mapaspasaran ditoy probinsia iti agdama.
Nupay kasta, inlawlawagna a dakkel ti posibilidadna nga agsasaruno dagiti agsangpet a pasahero mangrugi inton rabii wenno inton bigat gapu ta kalikagumda a mabisita dagiti tanem dagiti ay-ayatenda iti biag a pimmusayen.
Mainaig iti daytoy, kunana nga awan ti nagbaliw iti presio ti pagplete dagiti pasahero iti baet ti mapaspasangasangan nga Undas 2024.
Innayonna nga umdas ti bilang dagiti bus nga agbiahe gapu ta 24/7 ti operasionda.
Kabayatanna, naammoan a dagiti kangrunaan a biaheda ket iti Cagayan, Baguio ken idiay Manila.
