LAOAG CITY – Ngimmato ti bilang dagiti maad-admit a pasiente iti Mariano Marcos Memorial Hospital and Medical Center (MMMH & MC) iti siudad ti Batac a biktima ti panangabuso.
Segun ken ni Dr. Danilo Sanchez, Chairman ti Occupational Safety and Health iti nasao nga ospital, basar iti datosda manipud idi tawen 2022, 2023 pakairamanan ti Enero agingga Hunio 2024 ket apagapaman a ngimmato dagiti mairekrekord iti physical abuse, sexual abuse ken psychological abuse.
Inbatadna nga adda ti 130 dagiti maseknan a pasiente a nakapasar kadagiti nadakamat a panangabuso no sadinno a kaadduan kadagitoy ket napasamak idi kangitingitan ti COVID-19 pandemic.
Nupay kasta, inlawlawagna nga awan met dagiti report iti panangabuso a napasamak iti uneg mismo ti ospital wenno babaen kadagiti empleado.
Mainaig iti daytoy, inpakaammo ni Dr. Sanchez dagiti nagduduma a klase ti panangabuso iti ospital kas ti verbal abuse, physical assault ken psychological violence.
Kabayatanna, inpasagepsep ti Chairman iti Occupational Safety and Health nga adda ti tallo nga E strategies kas ti Engineer, Educate ken Enforce no sadinno ti Engineer ket masapol a naurnos ti work environment, ti Educate ket masapol nga adda ti panagsanay dagiti empleado idinto ti Enforce ket masapol nga uray adda dagiti pagannurutan no saan a napintas ti pannakaipatungpalna ket awan ti serserbina.
