LAOAG CITY – Nalimitaran agingga iti 30 a pasiente laeng ti mabalin a maakomodar iti Governor Roque Ablan Senior Memorial Hospital iti tunggal aldaw.
Daytoy ti inpakaammo ni Dr. Walbert Samonte ,ti OIC iti nasao nga ospital.
Segun kenkuana, daytoy ket maysa a wagas tapno maliklikan ti physical contact ken masurot ti social distancing.
Inbatad na a naiget ti ospital a mangkontrol kadagiti sumrek ken rumuar ti nadakamat a balay-pagagasan tapno maliklikan a mairisgo dagiti pasiente nangruna kadagiti frontliners wenno dagiti empleado seknan iti panagwaras ti COVID-19.
Inlawlawag na a maymaysa laeng ti maipalubos a pagserkan ken pagruaran pakairamanan pay ti panangdakamat na a ti biang ti Out-Patient Department ket adda ti nakaituding nga iskedyul; Lunes ken Huebes ti Internal Medicine, Martes ken Biernes ti Pediatrics ken Obstetrics Gynecology, Miyerkules ken Sabado para iti operasion ngem saan daytoy a limitado, Lunes, Martes ken Biernes ti Opthalmology, Lunes, Miyerkules ken Biernes ti Dental idinto a Lunes ken Biernes ti Animal Bite Center.
Maipalagip a naipatalged nga adda ti suplay ti Personal Protective Equipments wenno PPE’s para kadagiti frontliners gapu ta nagpasangpetda ti PPE’s manipod Department of Health Central Office nga agbalor ti tallo milyon a pisos.
