LAOAG CITY – Nanayun pay ti bilang dagiti naireport a pimmusay gapu iti idupduprak ti bagyo Enteng ken ti epekto ti abagat iti pagilian.
Basar iti datos ti National Disaster Risk Reduction and Management Council (NDRRMC), addan ti pakabuklan a 16 nga indibidual dagiti natay iti kalamidad.
Inpakaammo ti National Disaster Risk Reduction and Management Council a walo kadagiti pimmusay ket manipod iti Calabarzon, tallo iti Bicol Region, dua iti Central Visayas, dua iti Eastern Visayas, ken maysa iti Western Visayas.
Malaksid kadagiti natay ket kinumpirmaran pay ti National Disaster Risk Reduction and Management Council nga adda ti 17 a sabsabali a nagtalinaed a mapukpukaw idinto a 13 dagiti nasugatan.
Kabayatanna, adda ti 2,061,726 nga indibidual wenno 538,602 a pamilya ti naapektaran ti bagyo Enteng ken abagat iti Ilocos Region, Cagayan Region, Central Luzon, Calabarzon, Bicol, Western Visayas, Central Visayas, Eastern Visayas, Cordillera ken Metro Manila.
