LAOAG CITY – Nanayunan pay ti bilang dagiti natay iti napasamak nga stampede iti maysa nga istasyon ti tren idiay New Delhi , India no sadinno nga iti agdama ket umaboten iti 18.
Naamoan a karaman kadagiti natay ket uppat nga ubbing ken 10 a babbai.
Immuna iti daytoy, napasamak ti stampede kalpasan a nagdidinnuron dagiti tattao a mapan aglugan kadagiti tren nga agturong iti kadakkelan a festival iti lubong a Kumbh Mela.
Maiyus-uswat ti festival iti kada 12 a tawen iti Prayagraj, nga umal-allukoy kadagiti minilyon a deboto nga Hindu.
Inladawan pay dagiti otoridad a ti eksena ket maibilang a karisgoan a napasamak iti istasyon no ikompara kdagiti napalabas a tawen.
Mainaig iti daytoy, indanun a dagus ni Indian Prime Minister Narendra Modi ti pannakipagladingit na iti pamilya dagiti pimmusay iti nakaam-ames nga insidente.
