LAOAG CITY – Inbatad ni Police Capt. Joseph Tayaban, ti chief of police iti ili ti Badoc nga agtultuloy ti panagsangpet iti border control dagiti ado a Returning OFWs ken pakairamanan dagiti locally stranded individuals.
Segun ken ni Tayaban, sipud idi Marso 30 agpapan ita ket adda ti 154 a returning OFWs a nairekord da idinto a 416 dagiti locally stranded individuals.
Inbaga na a gapu iti kaadon dagiti agsangpet iti border control ket saan a maakomodar amin dagitoy ti isolation area.
Kuna na a ti pay pagamkan da ket no agtudo gapu ta possible nga agdudupudot dagiti maseknan iti isolation area ket saanen a masurot pay ti social distancing.
Iti baet daytoy, kuna ni Tayaban nga alisto met dagiti nagduduma nga LGUs a mapan mangsukon kadagiti kailian da nga adda iti border control.
Kabayatanna, inbatad ni Tayaban a basar iti OWWA ket manamnama nga ado pay nga OFWs ti agsangpet ditoy probinsya agingga intono aldaw ti domingo.
