LAOAG CITY – Umabuten ti 2,500 a tattao ti naibakwit kadagiti lugar iti Lower Puna, Big Island nga apektado iti agtultuloy a panagbettak ti Kilauea Volcano.
Daytoy ti imbatad ni Bombo international Correspondent Manny Pascua tubo iti ili a Pasuquin ngem residente ti Big Island idiay Hawaii.
Segun kenkuana,malaksid iti nasao a bilang dagiti tao a naibakwit ket adda metten 75 a pagtaengan ti linamot ti lava ken manamnama a manayunan pay gapu iti tuloy a panagayosna.
Kuna na a kaaduan kadagiti nadadael a pagtaengan ket manipud iti Leilani ken Lanipula Estates Subdivion iti Lower Puna.
Malaksid iti dasytoy, marikna payen dagiti residente iti makindaya a paset ti Hawaii ti panagngato ti bayadan da a konsumo ti kuryente kalpasan a nagsardeng ti operasyon ti Puna Geothermal Plant.
Kuna na a ti nasao a planta ti kuryente a mangpatpataod iti 38 Megawatts a kuryente ket sup-suplayan na ti pakabuklan ti Big Island.
Kabayatan na, nagmandaren ti Mayor Harry Kim kadagiti kameng Hawaii Police Dept. nga arestaren da dagiti residente a dadalaposen ti lava manipud iti agpuspuswak pay laeng a Kilauea, Volcano nga agkedked a mangtalaw kadagiti pagtaengan da.
Rumrumuar nga adda da pay laeng dagiti residente iti Leilani Estates Subdivision ti agkedked nga agbakwit iti rason nga adayo pay kadakuada ti lava ti nasao a volcano.
Nupay kasta, kuna ti Mayor a saan a rumbeng nga urayen dagiti residente ti idadalapos kadakuada ti lava kasanguanan nga agbakwit da.
Kabayatan na, iti kaudian a panagpuswak ti asok ken dapo ti nasao a volcano ket immabot ti 12 a ribo a kadapan ti kangato na.
