LAOAG CITY – Inpakaammo ni Bombo International News Corrrespondent Demetrio Bong Rafanan iti Rome, Italy, nga umaboten ti agarup 176 a ribo ti bilang dagiti kaso ti coronavirus ken nasurok 23 a ribo dagiti pimmusay iti intero nga Italya.
Iti nakalap ni Rafanan nga impormasyon, karaman iti bilang dagiti pimmusay dagiti lima nga overseas Filipino worker.
Kuna na nga innem met nga OFWs dagiti nalaingan manipud ti panagpositibo da ti virus.
Segun kenni Rafanan, basar kenni Prime Minister Giuseppe Conte a naiyalud-od ti lockdown agpatingga intono Mayo 3, ita a tawen.
Inbatad na nga iti Mayo 4, ket malukatan dagiti negosyo ngem masapul a sumurot dagiti tattao kadagiti pagalagadan kas panagsout ti face mask, gloves, ken social distancing.
Nakulatanen dagiti bookstore ken newspapers stores iti Italya.
Iti mainaig a damag, kinumpirmaran ni BINC Rafanan, iti Rome, Italy, a naikkan ti tulong dagiti nagsardeng ti panagtrabaho na.
Umabot ti 300 a euros agingga iti 600 euros wenno katukad ti nasurok 16 a ribo a pisos wenno nasurok 33 a ribo a pisos ken agdepende iti kaadu dagiti miembro ti pamilya.
Inpakaammo ni Rafanan a dagiti Pilipino nga addaan ti expired a permit to stay iti Italy ket saan a rumbeng nga agdanag gapu ta agngudo daytoy intono bulan ti Hunyo 30..
Daytoy ket agserbi a pawayway gapu ta saan a makarwar dagiti tattao tapno agrenew kadagiti nasao a permit agraman dagiti dadduma pay a dukomento.
