LAOAG CITY – Bimmaba ti bilang ti krimen a nairekord iti intero a pagilian.
Basar iti Philippine National Police (PNP), iti paylaeng napalabas a bolan ti Agosto ket addan ti panagbaba ti agarop 42 percent.
Nakairekord ti 2,087 a focus crimes ti PNP idi Agosto, nababbaba daytoy ti 41.77 percent wenno 3,584 a krimen a nairekord idi Agosto iti napalabas a tawen.
Ti panagtakaw kadagiti behikulo ti addaan ti kangatoan a panagbaba nga umabot iti 67.74 percent no sadinno nga addaan laeng ti 10 a kaso manipod iti dati a 31 no ikumpara iti kapada a tawen idi 2025.
Kabayatanna, ti met kaso ti rape ket bimmaba ti 58.65 percent no sadinno a manipod iti dati a 769 ket nagbali laengen a 318.
Adda met ti nagbabaan ti panagtakaw ti motorsiklo iti 102 a kaso manipod iti dati a 220 idinto a ti physical injury ket adda ti panagbaba na iti 46.83 percent nga addaan laengen ti 277 manipod iti dati a 521.
Immunan nga inpasigurado ni PNP chief General Jose Melencio Nartatez Jr nga iwaras dagiti kameng ti pulisya iti kalsada tapno masigurado ti kinatalged ti publiko.
