LAOAG CITY – Umabot iti 13,575 nga indibidual dagiti nairekord a nakagat ti aso ditoy Ilocos Norte idi 2023.
Daytoy ti inbatad ni Dr. Rickson Balalio, ti mangidadaulo iti Provincial Health Office iti gobierno probinsyal.
Inpakaammo ni Balalio a manipod iti nasao a bilang ket 15 ditoy ti natay a ti kaudian ket manipod ditoy ciudad ti Laoag.
Mainaig iti daytoy, inrakurak ni Balalio a saanen a makaumanay ti suplay ti bakuna kontra iti rabies ditoy probinsya isut gapuna a kiniddaw da iti Department of Health – Region 1 ti pannakaiyalokar ti nayun a rabies vaccine ditoy probinsya.
Innayon na nga iti biang ti gobierno probinsyal ket manarimaan ti proseso ti procurement ti pondo para iti bakuna, no sadinno a kastoy met ti ar-aramiden dagiti nagduduma a Local Government Units ditoy probinsya.
