LAOAG CITY – Nangabak ti bilyonaryo a negosiante a ni Andrej Babis iti parliamentary elections idiay Czech Republic, nupay ti populista a partidona nga ANO ket nagkurang iti overall majority.
Nakaawat ti ANO iti agarup 35% a butos a nakagun-od kadakuada iti 80 seats iti 200-seat lower house nga immadu manipud iti 72 seats nga addan ti uppat a tawenen ti napalabas basar iti preliminary results.
Ni Babis a nagserbi a prime minister manipud 2017 agingga 2021 ket manamnama a maawis a mangidaulo iti saritaan maipanggep iti pannakabukel ti baro a koalision.
Nangrugi ti panagbitla ni Babis kadagiti two small right-wing eurosceptic parties a nakabalin a nangpasa iti 5% a threshold: ti anti-Green Deal Motorists for Themselves, ken ti anti-immigrant Freedom ken Direct Democracy (SPD) party nga indauloan ni Czech-Japanese entrepreneur Tomio Okamura.
Inbatadna a kalikagumna nga agmaymaysa nga agturay ti ANO imbes a mangparnuay ti pormal a koalision.
