LAOAG CITY – Kinanselar ti bilyonaryo a ni Yusaku Maezawa iti Japan ti plano na a panagturong iti bolan babaen ti panaglugan na koma iti SpaceX vehicle.
Maipalagip nga idi pay 2018 a rinugyan ti bilyonaryo ti plano na para iti lunar flyby voyage.
Idi 2022 ket nagbayaden ni Maezawa para kadagiti walo a mangkuyug kenkuana iti maikadwa nga space journey kalpasan ti 12-day trip na iti International Space Station babaen ti Russian Soyuz spacecraft idi 2021.
Iti statement, nagpadespensar ni Maezawa gapu ta saannan nga ituloy ti panagbiyahe na iti bolan gapu ta saan a sigurado ti pannakapataud ti rocket ti SpaceX.
Naamoan nga umabot iti maysa a milyon nga aplikante ti nagpilian na kadagiti walo koma a kadwa na nga agbiyahe.
Karaman kadagiti walo a napili na ket ti lead rapper ti K-pop group Big Bang, Americans DJ Steve Aoki ken filmmaker Brendan Hall.
