LAOAG CITY – Nadismaya ni Bombo International News Correspondent Hector Baytec iti Canada iti panagbaba ni Canadian Prime Minister Justin Trudeau iti pwesto na kalpasan ti agarop maysa a dekada a panagserbina.
Patien ni Baytec a napintas ti annayas ti admistrasyon ni Trudeau nangruna no maipapan iti Climate Change, immigration policy ken ekonomiya.
Nu pay kasta inbatadna nga uray bimmaban iti pwesto ni Trudeau, isuna pay laeng ti maibilang a Prime Minister agingga a makapili ti Liberal party ti maisukat kenkuana.
Ngem inpaganetgetna a saan nga election ti agbalin a wagas ti panangpili ti sumukat a Prime Minister no di ket mangidutok da manipud kadagiti miembro iti Liberal Party.
Kunana a dua ti maipappalapayag a pagpilpilyan a mangsukat ken ni Trudeau, umuna ket ni Deputy Prime Minister Chrystia Freeland ti dati a Finance Prime Minister ti Canada ngem nagretiro laeng idi napan a bulan gapu iti isyu maipapan iti pangta ni incoming US President Donald Trump a mangipataw ti 25% tariff kadagiti Canadian goods.
Kabayatan a ti maikadua ket ti dati a Central Bank Chief ti Canada a ni Mark Carney.
Inlawlawag ni Baytec a nangrugi a bimmaba ti popularity rate ni Trudeau idi naabak ti kaaduan a kandidato da idi napalabas nga election.
Malaksid iti daytoy ket adda pay dagiti sumagmamano nga isyu a saan a kinayat dagiti sumagmamano a Canadians, kas iti nalukay unay nga immigration policy ken ti pannakai-legal ti panagusar ti marijuana.
Inpakammu na pay a ti panagbaba ni Trudeau ket posible a mangpababa met iti trust rate ti Liberal party.
