LAOAG CITY – Inrakurak ti girl group a BINI ti panangisayangkatda ti world tour inton 2025.
Basar iti grupo a ti world tour ket maawagan a “BINIverse.”
Mangrugi daytoy inton Pebrero 15 iti Philippine Arena ken kalpasan iti daytoy ket agturongdan iti ballasiw taaw.
Naammoan a dagiti sumagmamano a nadakamat a pakaisayangkatan ti konsierto ket idiay Singapore, Dubai, London ken Estados Unidos.
Kuna ti grupo nga adu pay a pagilian ti papananda nga irakurakda iti publiko kadagiti sumarsaruno a lawas.
Naammoan a ti walo a miembro a grupo ket nagbalin a naballigi iti inyuswatda a tallo a rabii a konsierto iti Araneta Coliseum.
Ti nasao a Pinoy girl group ti kakaisuna a karaman iti Grammy Awards a napili a “12 Rising Girl Groups To Know Now.”
Kabayatanna, sumagmamano a sikat a kanta ti grupo ket ti “Salamin,” “Pantropiko” ken dadduma pay.
