LAOAG CITY – Sinuspenso paylaeng ni Mr. Florante Riego, School Principal IV iti San Nicolas National High School ti panagkolektar ti 100 a pisos iti kada bolan manipod kadagiti nagannak iti kada bolan para iti authorized fees a pangsuporta kadagiti nagduduma nga school activities kas ti intramural, triangular, CUSSAA ken INDAA meet.
Daytoy ket kalpasan nga adda dagiti nagannak a nangidanun ti pakaseknan da ditoy Bombo Radyo Laoag mainaig ti daytoy a banag.
Nupay kasta, inlawlawag ni Riego a ti panagbayad ti 100 a pisos ket saan nga inkapilitan no di ket boluntaryo laeng aglalo ket naipalaon iti memorandum nga inpaulog ti Department of Education ti “No Collection Policy” kadagiti pagadalan.
Innayon na a saan a kada estudyante ti agbayad no di ket kada parent no sadinno a no adda ti uppat nga agkakabsat nga agad-adal iti nasao a pagadalan ket maysa laeng ti bayadan da.
Naamoan nga addaan ti agarop 2 ribo a nagannak nga agpapaadal iti San Nicolas National High School.
Inpakaammo na nga ita laeng a napagtutulagan ti Parent Teacher Association ti agkolektar ti 100 a pisos gapu ta kadagiti naglabas a tawen ket nagsolicit da kadagiti nagduduma nga indibidual gapu ta saan met a makaumanay ti MOOE wenno ti Maintenance and Other Operating Expencess da para kadagiti nasao nga aktibidad.
Kabayatanna, saan nga anamongan ni Konsehal Efren Butay, ti Chairman ti Committee on Education iti nasao nga ili ti nagbalin nga addang ti Parent Teacher Association gapu ta ilunglungalong na ti panagbalin a libre ti authorized fee kadagiti pagadalan iti ili ti San Nicolas.
