LAOAG CITY – Napadayawan ti Bureau of Internal Revenue (BIR) ditoy ciudad ti Laoag gapu ta naartapan da ti koleksyon da idi 2019.
Segun kenni Revenue District Officer Helen Leaño, ti target collection da laeng idi 2019 ket 33-milyon a pisos ngem immabot ti 1.8-bilyon a pisos ti nakolektar da.
Inpanakkel ni Leaño a ditoy laeng ciudad ti Laoag ti nakaartap ti koleksyon na iti intero a rehiyon uno.
Gapu iti daytoy, pinadayawan ni Regional Director Thelma Milabao ti BIR ditoy ciudad ti Laoag.
Kabayatanna, ginundawayan metten ni Leaño ti nagyaman kadagiti kakadwa na iti BIR ditoy ciudad iti ken amin a tax payers iti intero nga Ilocos Norte.
Naamoan a ni Leaño ket agpatingga laengen intono Enero 31 ita a tawen kas Revenue District Officer ditoy ciudad ken addan ti Travel Order na para iti panagturong na iti ciudad ti Urdanetan idiay probinsya ti Pangasinan.
Ni Leaño ket dua a tawen na a nagserbi iti BIR ditoy ciudad ti Laoag.
