LAOAG CITY – Inbatad ni Mr. Aldrin Camba, ti Revenue District Officer ditoy ciudad ti Laoag nga agtultuloy ti kampanya da mainaig iti panagisyu ti resibo dagiti establisimiento.
Inlawlawag ni Camba nga iti baro a paglintegan ket saanen a mandatory a resiboan dagiti items nga agbalor ti 500 a pisos agpababa.
Nupay kasta, no dumawat ti customer ket rumbeng nga ipaayan ti naggatangan na nga establisimiento.
Innayon na a dagiti items nga agbalor ti 500 a pisos agpangato ket masapol a resiboan ti establisimiento gapu ta no adda ti mapaneknekan ti Bureau of Internal Revenue a saan nga agis-isyu ket patawan da ti maiyannatop a multa.
Mainaig iti daytoy, kuna ni Camba a dagiti mailako a sag-lima gasut a pisos agpababa dagiti establisimiento iti uneg ti maysa nga aldaw ket masapol a pagtitipunen da iti maymaysa a resibo.
