LAOAG CITY – Nagballaag ti Bureau of Internal Revenue (BIR) nga agtultuloy ti operasionda tapno tiliwen dagiti retailer ken reseller ti iligal a vape products tapno malappedan dagiti vape smugglers nga iserrek ti produktoda ditoy pagilian a saan a dimmalan iti umiso a proseso.
Segun ken ni Bureau of Internal Revenue Commissioner Romeo Lumagui Jr., malaksid iti daytoy ket nagpanawagan ti health advocacy group a SafeVape PH kadagiti vape suppliers ken importers nga agparehistro, mangala ti lisensia kas maiyallubog iti Republic Act No. 11900 wenno Vaporized Nicotine and Non-Nicotine Products Regulation Act ken sumurot iti packaging standards.
Gagem ti grupo nga agbayad ti husto a buis dagiti vape suppliers tapno makatulong metten iti public health care program ti gobierno.
Nangiruar ti rakurak ti grupo kalpasan nga inaprobaran ti Department of Trade and Industry (DTI) Office for the Special Mandate on Vaporized Nicotine and Non-Nicotine Products (OSMV) ti aplikasion para iti akreditasion ti Guandong Boopower Industry Co. Ltd. (GBPI) ken ti local partner daytoy nga One Tech Ventures OPC.
