LAOAG CITY – Inbatad ni Bise Mayor Bobby Sacro iti ili ti Solsona a supresa ti selebrasyon ti kasangay na idi Nobiembre 18.
Segun kenkuana, saan na a ninamnama nga adda ti selebrasyon agsipod ta saan na a kayat nga adda ti agdudupodop a tattao nu bilang adda ti selebrasyon gapu iti pandemiya.
Nu pay kasta, kuna na a gapu ta adda ti surpresa ti dagiti kaopisinaan na ket in-inot ti panagpamakan na kadagiti sangaili na.
Inbatad na a gapu ta mabain a saan a mangakomodar iti supresa para kenkuana ket napan da inpakada iti barangay da ti panagselebrar na.
Inlawlawag na a saan a naggigiddan dagiti nakipagselebrar gapu ta adda ti napan nagmeryenda iti bigat, nagpangaldaw ken kaudian dagiti napan nangrabii.
Mainaig iti daytoy, kuna ni Sacro nga idi nalpas ti pangrabii ket napan nagpakada iti asawa na tapno maturog ngem nakita na nga agraragsak da kadagiti kabagyan da.
Gapu iti daytoy, kuna na nga immuna lattan a napan naturog ngem inbalakad na kadagiti kakadwa da iti pagtaengan a mairikep ti gate ken saan dan nga agpastrek ti sabali.
Innayun na a dagiti laeng nabati iti uneg ti solar da a nagraragsak ket dagiti kakabagyanda.
Nagpadespensar met ni Sacro kadagiti umili nu bilang adda ti nalabsing kadagiti maipatpatungal a protocols.
Immuna iti daytoy, adda ti naipadanon iti Bombo Radyo a maipagarup nga awan ti suot a face mask ken saan a nasurot ti social distancing iti pasken a naiyuswat iti pagtaengan ti bise mayor.
Kabayatanna, kinumpirmaran ni Brgy. Captain Menchie Bisac iti Brgy. Laureta nga inpakada ni Bise Mayor Bobby Sacro ti pannagselebrar na ti kasangay na idi Nobiembre 18 iti pagtaengan da iti nasao a barangay.
Inbatad ni Bisac a ni Brgy. Kagawad Michael Sacro nga anak met laeng ti bise mayor ti nangipakada kenkuana.
Kuna na nga ti inpalubos na nga oras ti selebrasyon ket agingga iti alas-nuebe ti rabii.
Mainaig iti daytoy, inbaga na nga inpaima na kenni Kagawad Sacro ti pannakaipatungpal dagiti health protocols agsipod ta saan a nakaatendar gapu kadagiti kumikom na iti dayta nga aldaw.
Mamati ti kapitan a nasapa a nalpas ti pasken gapu ta basar kadagiti naipadanon kenkuana nga imporasyon ket alas-siete ti rabii ket awanen dagiti ado a tattao.
