LAOAG CITY – Inbatad ni Vice Mayor Francis Espiritu iti ili ti Dumalneg a nakasagana a mangsango iti aniaman nga ipila a reklamo ti maysa a Rice trader a maipagarop a kinabil na.
Nupay kasta, inpetteng ti bise mayor a saanna nga ammo no ania ti inbagbaga ti rice trader a ni Mr. Froilan Suniga iti Bombo Radyo Laoag isut gapuna a saan a makaipaay ti naan-anay a sungbat iti alegasyon kontra kenkuana.
Ti laeng naibaga ti bise mayor ket saan a pudno a dinangran na ni Zuniga no di ket kinasarita na isuna a saan a pumanpanaw iti ili da tapno isuna lattan ti aggatang kadagiti irik dagiti mannalon gapu ta manarimaan ti panaggapas da, ngem maipagarop nga adda ti madi nga aktwasyon ti rice trader.
Immun-una iti daytoy, inistorya ni Suniga nga adda ti napateg nga inasikaso na ditoy ciudad ti Laoag para iti negosyo na ken gapo ta rabiin ken naturog iti kasera na ditoy ciudad.
Inadmitir ni Suniga nga idi rimwar iti ili da ket adda ti katulagan a pinirmaan da iti hepe ti Dumalneg a nakailanadan a masapol a dumalan iti 14-day quarantine no agsubli ngem awan ti kopya na.
Gapo iti daytoy, kuna ni Suniga a nagsubli ditoy ciudad ti Laoag ken napan nagpakada kenni Provincial Agriculture Normal Lagmay ken naikkan ti pammalubos a sumrek gapo ta agidel-deliver isuna kadagiti essential goods.
Inlawlawag na nga adda pay ti inted ni Lagmay a dokumento a mangibagbaga a mabalin a sumrek iti nasao nga ili ngem saan latta a napalubusan gapo ta masapol a malpas na ti quarantine ngem saan na a kayat gapo iti sagsagabaen na a depresyon.
Mainaig iti daytoy, kunana nga idi saan latta a nakastrek ket napan dimmanon ni Espiritu iti checkpoint ken maipagarop a dagus lattan a tinulpak ti bise mayor rason a natulid, kalpasan na ket intumeng ken kinugtaran na pay daytoy.
Ti nasao a pasamak ket kinumpirmaran a mismo ni Pol. Lt. Joselito Rigates, ti chief of police ti PNP-Dumalneg.
Kabayatanna, inpakaammo ni Police Major Rodelio Santos, ti mangidadaulo ti Provincial Investigation and Detective Management Branch iti Ilocos Norte Police Provincial Office (INPPO), kalpasan a naireport kadakuada ti napasamak ket nangiyuswat da met ti bukod nga imbestigasyon.
Manamnama nga ita nga aldaw ket ipila da ti reklamo nga slight physical injury babaen ti regular filing kontra ti bise mayor.
Innayon ni Santos a naibilin met iti hepe iti ili ti Dumalneg nga agpalawag gapu ta naimatangan na ti napasamak iti nagbaetan da Zuniga ken ti bise mayor.
