LAOAG CITY – Kiniddaw ni Vice Mayor Remigio Medrano iti ili ti Sarrat ken ni Liga ng mga Barangay President Jose Joulfin Talamayan Jr. a mangkita ti solusyon mainaig kadagiti naipadanon a saan nga umno a pannakaipapaay kadagiti dokumento kadagiti residente iti nasao nga ili manipod iti barangay.
Daytoy ket kalpasan nga indanun ti Municipal Social Welfare and Development nga adda dagiti barangay nga amin a residente ket maipagarop a nakalista kas indigent, kas iti Barangay 20, San Jose iti nasao nga ili, no sadinno nga inpetteng ti mayor a saan a mabalin ti kastoy gapu ta kwestyunable.
Inpetteng na a dagiti opisyal ti barangay ti rumbeng a mangtingiting a nasayaat no siasinno dagiti kwalipikado gapo ta daytoy ti pagibasaran ti lokal a gobierno kadagiti rebbeng a matulongan.
Malaksid iti daytoy, kuna pay ti bise mayor nga adda dagiti opisyal ti barangay a nangipaay ti barangay clearance kadagiti residente nga agaplikar ti tricycle franchise ngem
naduktalan a dagiti aplikante ket adda met iti balasiw taaw.
Inpetteng ni Medrano a rumbeng a solbaren daytoy ti presidente ti Liga ng mga Barangay ken saan a rumbeng nga agtultuloy ti kastoy nga aramid kadagiti nagduduma a barangay iti nasao nga ili.
Kabayatanna, iti regular session iti konseho ti nasao nga ili ket inreport ti Liga ng mga Barangay President ti sungbat dagiti maseknan a barangay kadagiti nasao nga isyu.
Inrakurak ni Talamayan a ti nagbalin a palawag ti kapitan iti Barangay 17 ket ti nangala ti barangay clearance tapno agaplikar para iti tricycle franchise ket kataltalaw na laeng iti nasao nga ili a nagturong iti isla ti Hawaii.
Innayon na nga inadmitir ti kapitan a saanna nga ammo a saan a mabalin a maikkan ti barangay clearance no awanen ditoy pagilian, kagiddan ti panagkiddaw na ti pammakawan.
Iti met biang ti kapitan iti barangay 20 ket naglikudan na ti report a nailista amin kas indigent dagiti residente iti idaulwan na a barangay ken inpasingkedna a dagiti adda iti datos ket inarisit a naimbag dagiti barangay kagawad na.
Nupay kasta, saan a napnek ti bise mayor iti report ni Talamayan gapu ta saan nga agtugma daytoy kadagiti indanun nga impormasyon kenkuana ti Municipal Social Welfare and Development Office.
Kunana a rumbeng a saan laeng a dagitoy ti kasarita na no di ket amin a kapitan iti ili ti Sarrat tapno maplano a nasaayat dagiti rumbeng nga aramiden da.
