LAOAG CITY – Inawagan ni Bise Presidente Sara Duterte dagiti panang-atake iti kabsatna a ni Davao City 1st district Rep. Paolo Duterte ken ti asawana a ni Mans Carpio kas political harassment ken political attacks.
Iti interview idi kalman iti siudad ti Davao, kinuna ti Bise Presidente a sipud pimmanaw iti Gabinete ni Presidente Ferdinand Marcos Jr. idi napan a bulan, rimmuar dagiti nadakamat nga isyu.
Mangnamnama ti Bise Presidente a saan a dumngeg dagiti umili iti arimbangaw no di ketdi ipamaysada ti pudpudno a parikut ti pagilian mainaig iti kinapanglaw ken nangina a presio ti taraon.
Daytoy ti inaramid ti Bise Presidente kalpasan ti umuna a pannakadengngeg ti nabukel a Quad committee panel ti Kamara idi Biernes idiay Bacolor, Pampanga no sadino a dagiti krimen a mainaig iti kontrobersial a POGO, extra judicial killings ken illegal drug trade ti nagbalin a pokus ti imbestigasion iti sidong ti napalabas nga administrasyon ni dati a Presidente Duterte.
Ditoy, innagan ti saksi ken dati nga ahente ti intelligence ti Customs a ni Jimmy Guban ti asawa ni Bise Pres. Sara a ni Mans Carpio ken ti kabsatna a ni Cong. Pulong ken dati a presidential economic adviser Michael Yang pannakaipuslit ti P11 billion a gatad ti shabu iti Manila International Container Port idi 2018.
Kabayatanna, inkidem ti Bise Presidente ti maipagarup nga impeachment complaint kontra kenkuana.
Kinunana, saan a nasdaaw gapu ta napudot ti politika ken kanayon nga pagsasaritaan dagiti kameng ti Lower House of Congress daytoy.
Maipalagip nga immuna a pinasingkedan ti dati a pannakangiwat ti presidente a ni Harry Roque a mangipila iti impeachment complaint kontra ken ni VP Sara ita a lawas.
