LAOAG CITY – Inbilin ti Korte ti Venezuela a temporario nga agserbi ni Vice President Delcy Rodríguez iti panangidaulo iti pagilian kalpasan nga inarestar ti Estados Unidos ni Presidente Nicolás Maduro nga itan ket adda iti New York City idiay Amerika.
Iti desision ti Korte, nabilin ni Rodríguez nga agakem iti temporario a kapasidad dagiti amin a responsibilidad ken bileg kas Presidente tapno masigurado ti panagtultuloy ti gobierno ken ti komprehensibo a panangikalintegan iti pagilian.
Nupay kasta, saan nga indeklarar dagiti mahistrado a permanente nga awanen iti puesto ni Maduro.
Basar iti linteg ti Venezuela, ti kastoy a deklarasion ket mangitunda iti panangisayangkat ti eleksion iti uneg ti 30 nga aldaw.
Iti agdama, temporario laeng ti panagtugaw ni Rodríguez kas mangidaulo ti estado kabayatan nga agtultuloy a madengdengngeg ti kaso ni Maduro.
