LAOAG CITY- Nagdinnungpar ti maysa a bisikleta ken motorsiklo iti paset ti Brgy. Lanao iti ili a Bangui.
Nabigbig iti nangiturong ti bisikleta a ni Loreto Soriano y Sagucio, agtawen ti 59, awanan asawa ken residente iti nasao a barangay idinto a ti driver ti motorsiklo ket ni Noriel Cuadro y Pedro, agtawen ti 34, naasawaan ken residente ti Brgy. Pina Weste, Gattaran, Cagayan ken ti lubbon na a ni Cleopatra Caliw-Caliw, agtawen ti 38, awanan asawa ken residente ti Brgy. San Lorenzo iti ili a Bangui.
Segun kenni Police Senior Master Sergeant Eddie Mar Yadao, agpada nga agpa-amianan a direksion ti bisikleta ken motorsiklo idinto a kellaat a naglikko nga agpakannigid ti bisikleta rason a nadungpar daytoy ti motorsiklo.
Gapu iti daytoy, natukkol iti akin-kannigid a luppo ti nangiturong iti bisikleta idinto a nagsagaba ti sugat ti ulo iti lubbon ti motosiklo ken nagsagaba ti sugat iti driver ti motorsiklo .
Naammoan a saan a nakasuot ti helmet dagiti nakalugan iti motorsiklo ken awan iti impluwensiya ti nasanger dagiti maseknan.
Iti agdama, nagtalinaed iti Gov. Roque Ablan Sr. Memorial Hospital ti nagiturong ti bisikleta ken iti lubbon ti motorsiklo.
