LAOAG CITY – Inpasgurado ti Bureau of Jail Management and Penology (BJMP) nga addan dagiti nakasagana nga addang na tapno maprotehiran dagiti person deprived of liberty (PDL) iti manamnama nga ad-adda pay a panagpasar ti nabara a panawen.
Inbilin ni Bureau of Jail Management and Penology chief Jail Director Ruel Rivera iti amin a jail facility nga i-monitor ti health conditions dagiti balud kangrunaan na iti Metro Manila a mangitunda iti nakaro a risgo ti nakaro a kinabara ti panawen ken panagdudupudop iti uneg dagiti pagbaludan.
Inpetteng ni Rivera a kasapulan iti naan-anay a panagsagana tapno mailiklik dagiti balud kadagiti sakit a mabalin a maala manipod iti kinabara ti panawen.
Nakaalerto metten 24/7 dagiti jail health personnel ken jail nurse ti Bureau of Jail Management and Penology para iti panagresponde da kadagiti medical emergency.
Naiget pay ti pammalin ni Rivera nga urnusen dagiti bentilasyon dagiti pagbaludan, panagikabil ti exhaust fans ken ventilation shafts tapno mapasayaat ti airflow kadagiti dupudop a pagbaludan.
Naamoan a nakagatang payen ti Bureau of Jail Management and Penology kadagiti kasapulan nga agas gapu iti manamnama a panagngato ti kaso dagiti sakit nga adda ti pakainaigan ti bumarbara a panawen.
