LAOAG CITY – Inpasigurado ti Bureau of Jail Management and Penology wenno BJMP a nakasaganan ti pagtalinaedan a pagbaludan dagiti uppat a kadua nga akusado iti kaso ni Pastor Apollo Quiboloy.
Inpetteng ni Bureau of Jail Management and Penology Spokesperson Jayrex Bustinera nga awan ti ‘Very Important Person” wenno VIP treatment kada Jackielyn Roy, Ingrid Canada, Sylvia Cemañes ken Crisente Canada.
Kinunana a makikadua kadakuada dagiti dadduma a balud iti pagbaludan.
Ngem nu pay kasta ket inpasigurado ti Bureau of Jail Management and Penology ti kinatalged dagiti uppat nga akusado.
Kinunana pay a saan a lapped iti seguridad dagiti uppat ti congestion wenno adu unay a balud iti Pasig City Jail.
Segun kenni Bustinera, iti agdama, adda 1,511 a lallaki a nakabalud iti male dormitory ti Pasig City Jail, a rumbeng laeng a 250, idinto nga iti maysa a selda ket addaan iti 30 a balud a rumbeng laeng nga addaan iti 4 wenno 5, bayat a 138 a person’s deprive of liberty ti naikulong iti dormitorio dagiti babbai a para laeng kuma iti 28 a balud.
Inadmitir pay ti opisyal a 500 porsiento a napusek ti Pasig City Jail.
