LAOAG CITY – Inpasigurado ti Bureau of Jail Management and Penology (BJMP) nga awan ti VIP treatment ti aw-awaten ni Engr. Brice Hernandez iti Pasay City Jail, kalpasan a naiyakar manipus iti PNP Custodial Center.
Segun kenni BJMP spokesperson Jayrex Joseph Bustinera, adda ti nayon a seguridad iti pagbaludan kalpasan ti pannakaiyakar ni Hernandez.
Iti agdama, solo isuna iti selda kas paset iti mandatory quarantine protocol para kadagiti baro a kaserserrek a balod.
Saan a mapalubusan ti siasinno man a kadwaen ti baro a balod kabayatan nga adda iti quarantine period ken temporaryo a naipawil ti panagawat ti bisita kenni Hernandez.
Ni Engr. Hernandez ket naipan iti Pasay City Jail basar iti bilwg ti contempt order ti Senate Blue Ribbon Committee mainaig iti maiyus-uswat ti imbestigasyon. Agtultuloy a banbantayan ti BJMP ti sitwasyon tapno masigurado ti kinatalged ken kinakapya iti uneg ti pasilidad.
