LAOAG CITY – Nangitunda iti panagamak dagiti residente iti Brgy. Ezperanza iti ili ti Vintar gapu ti makitkita da a nangisit nga eroplano nga agsubli-subli iti batugen ti nasao a barangay.
Segun kenni Mr. Jayson Baay, residente iti nasao a barangay, nangrugi a nakita da ti bassit nga eroplano sipud itay bigat.
Kinumpirmaran na a 12 a daras a nagsubli-subli ti bassit nga eroplano iti area da ken possible a mapan pay iti batog ti Tadao, Pasuquin wenno iti direksiyon a laud ken daya.
Kuna ni Baay a saan da nga ammo no anya iti operasyon ti nasao nga eroplano ketdi agtultuloy a sipsiputan da.
Inbatad na a tumtumbuken ti eroplano iti bantay iti Tamdagan ken bantay iti Tadao, wenno Carusikis iti ili ti Pasuquin.
Innayon ni Baay a kalpasan ti sumagmamanpo a daras a panagsubli-subli ti nasao nga eroplano ket nagpaabagatan met a direksiyon.
Saan met a masigurado ni Baay no ti eroplano ket adda ti birbiroken na wenno anyaman iti ar-aramiden na ngem naamuan na nga adda ti proyekto ti chinese iti ili ti Pasuquin ken possible nga adda pay iti Brgy. Canaam Vintar.
