LAOAG CITY – Manamnama a maiyuswat ti blood sampling kadagiti baboy iti ili ti San Nicolas partikular kadagiti surveillance area wenno dagiti masakupan ti 501 agingga iti 1,000 meter radius manipod iti nakakitaan ti kaso ti African Swine Fever (ASF).
Kuna ni Mrs. CecilLe Sambrano, ti municipal agriculturist iti nasao ili a ti nasao nga addang ket wagas tapno maderminar nu presente pay laeng ti virus iti lugar wenno saan.
Inbatad na a daytoy ket tapno madeterminar pay nu mabalinen a maideklara a pink zone dagiti nakaduktalan ti kaso ti ASF ken dagiti kabangibang a lugar.
Inpakaammo ni Sambrano nga apaman nga agnegatibo ti resulta ti blood sampling dagiti baboy ket dita a maipalubos ti panagtaraken ti baboy dagiti hog raisers.
Naamoan a tallo laeng a barangay dagiti nabati nga adda iti green zone wenno dagiti awanan ti kaso ti ASF iti ili ti San Nicolas.
