LAOAG CITY – Maysa a babai manipud idiay United Kingdom ti addaan ti naisangsangayan a blood type a mabalin nga i-freeze iti uneg ti 30 a tawen para kadagiti pasiente nga agkasapulan.
Basar iti report, nabayagen nga agidondonar ti dara ni Mina Stoddart-Stones, agtawen ti 26 manipud iti Bridgwater ngem idi laeng kallabes a naammoanna a karaman isuna kadagiti manmano laeng a donor nga addaan ti naidumduma a blood type iti pagilian.
Basar iti NHS Blood and Transplant, siam laeng a tao idiay United Kingdom ti addaan ti kapada a blood type nga U negative ken N negative isut gapuna a ti indonarna a dara ket mabalin nga i-freeze ken idulin agingga iti 30 a tawen para kadagiti pasiente nga agkasapulan.
Paset ni Stoddart-Stones ti rare donor panel ti NHS a bukbuklen ti agarup 1,200 a tattao wenno 0.01 percent laeng ti sumurok 800,000 blood donor iti pagilian.
Naammoan nga us-usaren ti kastoy a naidumduma a dara para kadagiti pasiente nga addaan ti kapada a blood type a kasapulan ti transfusion pakairamanan dagiti addaan ti sakit kas ti Sickle Cell Disease.
