LAOAG CITY – Kwinestyunaran ni Sang. Panlalawigan Member RJ Fariñas ti saan a panangimbitar kenkuana ti Committee on Health iti naisayangkat a Committee meeting para iti kalikagom a manayunan ti maawat a benepisyo dagiti Barangay Health Workers, Barangay Nutrition Scholars ken Barangay Service Point Officers ditoy probinsya.
Daytoy ket kalpasan a ti nasao a lungalong ni Fariñas ket naiwithdraw wenno mairekonsiderar.
Sinaludsod ni Fariñas no apay a saan a naimbitaran daytoy gapo ta miembro met daytoy iti komite, ken no napaayaban dagiti presidente dagiti Barangay Health Workers, Barangay Nutrition Scholars ken Barangay Service Point Officers.
Ditoy a sinaludsod pay ni Fariñas no adda ti nangiyuswat a committee hearing ken no kaano daytoy.
Simmungbat met ni Hon. Ryan John Pascua, ti Liga ng mga Barangay President a ti naiyuswat ket committee meeting, saan a committee hearing.
Mainaig iti daytoy, nagpadespensar ni Pascua kenni Fariñas kalpasan a saan a naimbitaran iti committee meeting.
Kabayatanna, maysa kadagiti dinakamat ni Pascua no apay a naiwithdraw ti lungalong ket gapo ta awan ti makaanay a pondo para iti daytoy.
Innayon na a maysa pay kadagiti rason ket ti redundancy gapo ta adda metten ti ipapaay ti probinsya kadagiti maseknan no Disyembre.
