LAOAG CITY – Naiget a sursuroten ti Ilocos Norte Police Provincial Office iti pannakaipatungpal ti Body Mass Index (BMI) kadagiti kapulisan.
Daytoy ti inpasingked ni P/Major Lauro Milan ti Chief ti Provincial Human Resource Doctrine Development kas direktiba ni PNP Chief Gen. Archie Gamboa.
Segun kenni Milan, adda dagiti sumagmamano a kameng ti INPPO iti saan a nakapasa iti BMI rason a nangisayangkat da ti Lose to Win Challege:Reloaded.
Inlawlawag na nga adda dagiti kategorya ti BMI kas ti underweight, normal ken overweight babaen iti pannakontar ti tawen, tayag, kadagsen ken body built ti maysa a pulis.
Inbatad ni Milan a masapul a 2 a kilos iti maikissay iti uneg ti maysa a bulan.
Innayon na a posible nga adda iti sangoen a sanctions dagiti saan a sumurot iti daytoy a pagalagadan.
Iti agdama, agtultuloy ti panagmonitor da kadagiti pulis ken manamnama nga agbalin a normal iti BMI da iti mabiit.
