LAOAG CITY – Inmanamong ti Boeing a mangaklon iti kaso a “conspiracy to defraud” nga inpila ti Estados Unidos kalpasan a natakuatan nga adda pakainaigan da iti namindua a panagsuek ti 737 Max idi 2018 ken 2019 a nakatayan ti 346 a pasahero ken crew members.
Segun iti statement ti korte, naipila ti plea idi napan a lawas, kalpasan ti naan-anay a panagadal iti kaso.
Iti katulagan nga inparuk-at ti Department of Justice ti Estados Unidos, inmanamong ti Boeing nga agbayad iti $487.2 milion a multa, ken mangipuonan iti saan a nababbaba ngem $455 milion iti uneg ti tallo a tawen tapno mapapigsa dagiti programa da seknan iti panagtungpal kadagiti pagalagadan ken panangsigurado ti kinatalged.
Kabayatanna, nakagun-od met ti isyu iti nagduduma a reaksion manipud iti publiko, nangruna dagiti nagbalin a biktima iti insidente.
