LAOAG CITY – Inrakurak ni Sangguniang Panlalawigan Member Franklin Respicio ti Chairman ti Committee on Ways and Means a dagiti mapalubosan laeng a sumrek iti Ferdinand Edralin Marcos Stadium ket dagiti mangiyuswat ti Sports Activity.
Daytoy ti nagbalin a sungbatna iti saludsod no mapalubosan dagiti umili a mapan laeng agtambay iti nasao a lugar.
Segun ken ni Respicio, dagiti laeng mapalubosan a sumrek ket dagiti indibidual nga agbayad iti entrance fee a 30 a pisos ken nasken a sumurotda iti facility dress code.
Inbatadna a ti entrance fee a masingir ket para laeng iti panagusar iti oval track kas maibasar iti nakailanad iti ordinansa a naipasa iti Sangguniang Panlalawigan.
Inlawlawagna a daytoy ket kalpasan a kiniddaw ti Sports and Development Office ditoy probinsia tapno mausar iti pannakamentenar iti nasao a pasilidad.
Kunana a ti gatad a nakaipalaon iti ordinansa ket basar iti panagsingir dagiti dadduma a probinsia kadagiti Sports Complex-da.
Innayonna nga iti agdama ket manarimaan a main-inaw iti pannakaestablisar ti electronic system no sadino a ditoy a mabalin nga agbayad dagiti umili iti kada bulan imbes nga inaldaw tapno maliklikan iti hassle payment dagiti bisita wenno turista iti entrance fee.
