LAOAG CITY – Nabayagen a problema ti spaghetti wires wenno dagiti agbibitin ken agkukumpol a waywaya ditoy probinsia.
Daytoy ti nagbalin a rason ni Sang. Panlalawigan Member Hanson Chua tapno ilungalong ti ordinansa a kalikagum a maiplastar dagiti waywaya ditoy Ilocos Norte.
Segun kenni Chua, adda dagiti gundaway a saan a compliant dagiti telecommunications company iti ruling ti Department of Public Works and Highways a 4-8 meters ti kangato na koma dagiti waya ngem kaaduan kadagitoy ket nababbaba ngem uppat a metro manipod iti ground.
Innayon ni Chua a ti maysa pay a rason no apay nga umad-adu dagiti agbibitin a kable ket gapu ta kaaduan a kliyente ti telecommunication company ket saan da a kayat pay nga iretrieve dagitoy gapu ta nangina.
Nupay kasta, kunana a kasapulan a madalusan dagitoy gapu ta isuda a mismo ti akin- rugit wenno warang da.
Kabayatanna, kalikagum ti bokal ti underground cabling intono sumaruno a tawen laketdi madalusan dagitoy a waya ti telecommunications.
Aminado ti bokal a saan a maipatungpal a dagus gapu ta ado paylaeng a proseso ti maaramid ken ipangpangruna na paylaeng ti pannakadalos dagiti agbibitin ken tangled wires ditoy probinsya.
