LAOAG CITY – Kwinestyunaran ni Sangguniang Panlalawigan Member James Paul Nalupta dagiti agbanbantay a pulis iti Border Checkpoint iti Siudad ti Batac.
Segun kenkuana, daytoy ket kalpasan a masansan a maobserbaranna iti panagawid na iti Siudad ti Batac a sabali ti ar-aramiden dagiti naka-duty a pulis a naidesignar nga agmonitor kadagiti dumalyasat a luglugan.
Inbatadna a masansan a makita na nga agsel-cellphone dagiti naka-duty a pulis imbes a kitaenda dagiti dumalyasat a motorista amangan no adda ti makalusot a nagilugan ti baboy.
Nairiing ni Bokal Nalupta daytoy a banag bayat a napagsasaritaan no kasano ti pannakapaiget ti panagbantay dagiti otoridad iti possible a kaadda dagiti agipuslit ti baboy nga aggapu kadagiti naapektaran ti African Swine Fever wenno ASF virus.
Gapu iti daytoy, makikoordinar ti Sangguniang Panlalawigan iti Provincial Veterinary Office tapno agbalin nga alerto ken istrikto dagiti mai-deploy a pulis kadagiti Border Checkpoints.
Mainaig iti daytoy, agpapan maisursurat daytoy a damag ket saan pay nagsungbat ti tawag ti Bombo Radyo Laoag ni Police Lieutenant Colonel Roger Digmayo, ti Chief of Police iti ciudad to Batac tapno maala koma ti takderna maipanggep iti daytoy a banag.
