LAOAG CITY – Inkiddaw ni Sangguniang Panlalawigan Member Atty. Saul Paulo Lazo kadagiti Local Government Units ditoy probinsia a makikooperarda iti panangkita no adda dagiti unauthorized connections kadagiti poste ti Ilocos Norte Electric Cooperative.
Daytoy ti inpakaammo ni Bokal Lazo kalpasan a naipadanon kenkuana a naduktalan iti lokal a gobierno ditoy siudad ti Laoag nga adu dagiti kable a naikonektar nga awan iti naan-anay a pammalubos iti nasao nga kooperatiba.
Segun kenkuana, daytoy ket epekto pay iti saan a dagus a pannakaikkat dagiti kable nangruna kadagiti private entities nga agexpired iti subscription-da.
Inbatadna a no kastoy ti mapaspasamak ditoy siudad ti Laoag ket dakkel ti posibilidadna nga adda met iti kapada a situasion iti dadduma nga ili ken siudad ditoy probinsia.
Inlawlawagna a no agtultuloy ti nasao a pasamak ket naalas a makitkita ken mangitunda pay ti aksidente ken system lost.
Kabayatanna, kuna ni Lazo a maipaayan ti notice wenno pakaammo dagiti private entities a maduktalan a nangaramid iti unauthorized connection ken no saanda a sumurot ket mangputarda ti ordinansa a mangipaay ti pannusa kadakuada tapno maliklikan a maulit daytoy.
