LAOAG CITY – Nag-abstein ni Bokal Saul Lazo iti pannakapagbalin a valid ti gakat para iti pannakaipasdek ti cockpit arena ditoy ciudad ti Laoag.
Segun kenkuana, maibasar iti Presidential Decree No. 449 Series of 1974 wenno ti Cockfighting Law of 1974, nailanad ditoy nga adda iti sakup wenno asideg iti residential buildings, commercial buildings, ospital, simbaan, pagadalan pakairamanan dagiti public buildings ti pakaipatakderan ti cockpit arena banag a naiget a maipawil.
Inbatadna a nag-abstein gapu ta makita na a masalungasing iti nasao a paglintegan no naan-anayen a maipatungpal ti pannakaipasdek ti cockpit arena iti Brgy. 1, San Lorenzo ditoy Siudad ti Laoag.
Inlawlawagna a manipod iti 100 meter radius ket nagbalin laengen a 20 meter radius ti nasken a kaadayo ti maipatakder a cockpit arena tapno saan unay a maapektaran dagiti maseknan nga umili nga isu ti makitana nga agbalin a parikot apaman a maipatungpal ti nasao a gakat.
Mainaig iti daytoy, inkalintegan ni Sangguniang Panlalawigan Member Franklin Respicio, Chairman ti Committee on Laws a ti lugar a pakaipatakderan ti cockpit arena ditoy Siudad ti Laoag ket maibilang a tourist zone kas maibasar iti Zoning Law wenno Ordinance ditoy Siudad rason a maipalubos ti pannakaipasdek ti cockpit arena ditoy Siudad.
Kabayatanna, 10 dagiti pimmabor iti Laoag City Ordinance No. 2022-038 idinto nga absent da Bokal Rodolfo Fariñas III ken Philippine Councilors League President Handy Lao idinto a nagserbi kas Presiding Officer ni Senior Board Member Rafael Chua Medina.
