LAOAG CITY – Nakasublin iti winning forms ti Meralco Bolts kalpasan nga inabakna ti NLEX 105-91 iti agtultuloy a PBA 49th Season Commissioner’s Cup a naiyuswat iti Ninoy Aquino Stadium.
Indauloan ti panangabak ti Bolts ni Akil Mitchell a nakairekord ti 24 points ken 11 rebounds idinto nga adda ti lima nga umaayam pay a nakaaramid ti double digits.
Addaan ti 16 points ken innem a rebounds ni Bong Quinto, 13 points met ti naaramid ni CJ Cansino, sag-11 points met da Chris Banchero ken Aaron Black idinto nga addaan ti 10 points ni Chris Newsome.
Inadmitir ni Meralco coach Luigi Trillo a ti umuna a kuarter ti ay-ayam ket nagbalin a karit kadakuada agingga idi nakadanonda iti second half ket ditoyda nga immarangkada.
Saan met nga umdas ti 38 points ken 21 rebounds ni Michael Watkins ken 19 points ken 10 assists met ni Robert Bolick para iti Road Warriors.
