LAOAG CITY – Nangabak ti Meralco Bolts kontra iti Rain or Shine iti iskor a 121-111 iti agtultuloy a PBA Season 49 Commissioner’s Cup.
Maibilang ti ay-ayam nga all-Filipino gapu ta agpada nga awan ti import dagiti dua a koponan.
Ti import ti Elasto Painters a ni Deon Thompson ket saanna a naiyurnos ti special work permit-na idinto a rugi pay laeng iti ay-ayam ket nagsagaba ti sugat iti rupa ni Akil Mitchell ti import ti Bolts.
Bimmida iti panagballigi ti Bolts ni Chris Newsome a nakairekord ti 25 points idinto nga addaan ti 20 points ni Bong Quinto, 16 points ti nairekord ni Jansen Rios, 12 points ken 16 rebounds ti naaramid ni Raymond Almazan ken addaan ti 11 points ken 11 rebounds ni Chris Hodge.
Addaan ti dua a panangabak ken awan pay ti abakna ti Bolts idinto ti Painters ket awan pay ti panangabakna ken addaan ti maysa a pannakaabak iti panangrugi pay laeng ti conference.
