Naartapan iti daytoy a tawen ti bilang dagiti benepisyaryo ti Bombo Medico nga iyus-uswat ti Bombo Radyo Philippines iti kada tawen.
Daytoy ket gapu ta immabot ti kadagupan a 74, 558 a tattao dagiti natulongan ti Bombo Medico 2017 idinto nga immabot laeng ti 67,467 dagiti nagbalin a benepisyaryo ti Bombo Medico 2016 iti intero a pagilian.
Manipud iti kadagupan, 38, 234 a tattao dagiti naipaayan ti serbisyo medical, 10,777 a tattao dagiti naipaayan ti serbisyo dental ken 25,547 a tattao dagiti naikkan ti sabsabali a serbisyo.
Agdagup ti 1,905 a tattao dagiti naipaayan ti serbisyo ti Bombo Medico iti daytoy a tawen ditoy siudad ti Laoag
Immabot ti 988 a tattao dagiti naipaayan ti serbisyo medical, 296 a tattao dagiti naipaayan ti dental service ken 621 dagiti naikkan ti sabsabali pay a serbisyo.
Napalaos ti panagyamyaman ti Bombo Radyo kadagiti amin a timmulong a nangipaay ti serbisyo kadagiti nagkasapulan kangrunaan kadagiti nagkakaanos a doktor manipud iti Ilocos Norte Medical Society, Philippine Dental Association Ilocos Norte Chapter, Nurses, Medical Reprsentatives, Pugad Lawin ken dagiti nangipaay ti tulong ken donasyon.
Malaksid iti libre a medical ken dental ket ado pay dagiti naipaay a dadduma a serbisyo.
Karaman ditoy ti libre a panagpadalos ti kuko, panagpukis, panagpamasahe ken dadduma pay.
Malaksid iti daytoy, nabunungan pay dagiti amin a nakipagpaset ti bombo medico ti taraon kas ti aruscaldo ken pancit.
Ti Bombo Medico ket tinawen nga iyus-uswat ti Bombo Radyo nationwide kas paset ti corporate social responsibility da.
