LAOAG CITY – Napalaos ti panagyaman ti liderato ti Bombo Radyo Philippines para iti baro manen a pammadayaw a naawat na iti naiyuswat a 5th Platinum Stallion Media Awards 2019.
Nabigbig ti Bombo Radyo kas Most Reliable AM Station babaen ti Trinity University of Asia idiay Quezon City.
Indaulwan ti nasao nga awards giving body dagiti estudyante manipud iti Media and Communication Department ken Events Management iti babaen ti Program Chairman a ni Dr. Walter H. Yudelmo.
Daytoy ket kas paset iti pannakabigbig ken pannakaited ti pammadayaw iti agtultuloy a panagserbi dagiti nagduduma a personalidad iti benneg ti broadcast media, kasta met iti showbiz, TV, print ken theater arts.
Napili dagiti nangabak babaen ti university-wide survey a nakipagpasetan, saan laeng a dagiti estudyante iti nasao a pagadalan ngem uray dagiti nagannak, faculty, alumni, maintenance staff ken dadduma pay.
Pammaneknek laeng daytoy nga award a maysa ti Bombo Radyo kadagiti mapagtalkan a media entity mainaig iti panagirakurak kadagiti damdamag.
Ti pannakabigbig ti Bombo Radyo kas Most Reliable AM Radio Station ket maisagot kadagiti amin a listeners gapo iti agtultuloy a panagtalek iti programa ken promo iti naunday a panawen.
Ti Bombo Radyo Philippines ket nasuruken a lima a dekada nga agserserbi ken addaan ti 31-strong AM ken FM stations nationwide.
