LAOAG CITY – Intaray ti bookkeeper ti Barangay Casili ditoy ciudad ti Laoag ti agarop 70 ribo a pisos a pondo ti nasao a barangay.
Ti nasao a pondo ket mausar a pangpatarimaan ti barangay hall ti nasao a lugar.
Nupay kasta, kalpasan a naikkan ti memorandum ti suspek a ni Mr. Jimmy Agustin ket insubli na met laeng ti kwarta.
Segun ken ni Barangay Secretary Rolando Dacquioag ti Barangay Casili, nabayag sakbay nga insubli ni Agustin ti kwarta gapu ta inyur-uray na pay laeng ti naited a memorandum.
Naamoan a malaksid ti kwarta nga innala ni Agustin ti nasao a barangay, adda pay ti maipagarop nga innala na a 170 ribo a pisos manipod ti maysa a contractor.
Malaksid ti panagbalin a bookkeeper ni Agustin ti barangay da ket agserserbi pay kas bookkeeper met laeng iti City Accounting Office ti gobierno ti ciudad ti Laoag.
Gapu ti napasamak ket dumalan ni Agustin ti Disciplinary and Separation Board (DSB).
