LAOAG CITY – Naiget ti pannakaipatungpal ti border checkpoint iti ili ti Badoc kas panaglapped ti panagwaras ti coronavirus disease.
Segun kenni Police Capt. Joseph Tayaban, hepe ti PNP Badoc, kadua da dagiti kameng ti Inter-Agency Task Force iti panangiwayat ti nasao nga addang.
Kuna ni Tayaban a maaddaan kuma pay ti nayun a thermal gun scanner tapno al-alisto ti panangkita da ti temperatura kadagiti agbibiyahe ken tapno saan a makaabeng iti taray ti trapiko.
Inbatad na nga inpakaammo da kadagiti Provincial Health Office no bilang adda ti maduktalan nga agurigor a sumrek ditoy probinsya.
Mainaig iti daytoy, kadua da dagiti nagduduma a kameng ti municipal health a mangkita kadagiti sumrek a tattao no addaan da ti sintomas ti COVID-19.
Segun kenni Tayaban, maidalan da iti clearance babaen kadagiti kakadua da nga otoridad, ken isuda ti makaammo iti pannakaiquarantine dagiti maseknan.
Adda pay ti monitoring nga iwayat dagiti opisyal ti barangay iti uneg ti barangay da.
Kabayatanna, malaksid iti ili ti Badoc, adda pay ti maipatpatungpal a border checkpoint iti ili ti Pagudpud.
