LAOAG CITY – Agtultuloy ti maiwaywayat a boarder control kadagiti entry ken exit points iti ili ti Sarrat tapno maliklikan ti pannakaapektar ti African Swine Fever virus dagiti taraken a baboy iti nasao nga ili.
Daytoy ti inpakaamo ti mayor iti ili ti Sarrat kalpasan nga adda dagiti rumrumuar nga impormasyon a karaman iti ili ti Sarrat a nakairekordan ti baboy a positibo ti nasao a virus.
Kunana nga iti agdama ket saan da pay a makumpirmaran no adda ti kinapudno na ti report gapu ta awan pay ti opisyal a deklarasyon wenno anunsiyo ti aniaman nga ahensiya ti gobierno nga adda ti nagpositibo ti African Swine Fever virus iti ili ti Sarrat.
Nupay kasta, inmandar a dagus ti Municipal Agriculture office ti pannakaestablisar ti checkpoints kadagiti exit ken entry points iti ili ti Sarrat tapno mainspeksyon a naimbag dagiti maiserrek ken mairuwar a baboy iti nasao nga ili.
Kabayatanna, inpakaammo ti opisyal nga immunan nga adda ti na-test a baboy iti Barangay 13 iti ili ti Sarrat iti kallabes ngem amin dagitoy ket negatibo iti nasao a virus.
Iti agdama, kuna ti mayor a naimandar kadagiti amin nga agtartaraken ti baboy ti mandatoryo a panangiwayat da ti biosecurity measures gapo ta patien na a babaen iti daytoy ket maiyadayo dagiti taraken iti virus.
